Joan Mir kampion i MotoGP, piloti i Suzukit merr titullin për herë të parë në karrierë

Joan Mir fiton për të parën herë titullin kampion bote me MotoGP. Edhe pse u rendit në vendin e shtatë në çmimin e madh të Valencias, ishte mjaftueshëm që 23-vjeçari të arrinte suksesin e tij më të madh në karrierë deri më tani.

Një sukses shumë i rëndësishëm për pilotin e Suzukit, që në pistën e Valencias pati dhe ndihmën e shokut të tij të skuadrës, Alex Rins si dhe nga rrëzimi që në fillim i francezit Fabio Quartararo.

Pavarësisht zhvillimit të një tjetër gare, për të mbyllur sezonin, Mir është matematikisht kampioni i ri i MotoGP.

Nuk duhet harruar, që një nga pretendentët e mëdhenj të sezonit si Marc Marquezu u tërhoq që në fillim të sezonit, për shkak të një dëmtimi.

Sa i takon garës së Valencias, në Tormos, i pari që e kaloi vijën e finishit ishte Franco Morbidelli, ndërsa vendet pas tij u pozicionuan nga Miller dhe Espargaro.

Në vendin e tetë u rendit Andrea Dovizioso, ndërsa Valentino Rossi u mjaftua me vendin e 12-të.