Kabineti i luftës i jep autorizimin Netanyahut të nis hakmarrjen ndaj Hezbollahut

Kabineti i sigurisë i Izraelit ka autorizuar kryeministrin Benjamin Netanyahu dhe ministrin e tij të mbrojtjes që të vendosin se kur dhe si do të hakmerren për sulmin vdekjeprurës nga Hezbollahu.

Ministrat u takuan në një seancë urgjente pas sulmit në lartësitë e Golanit të pushtuara nga Izraeli të shtunën në mbrëmje, ku u vranë 12 fëmijë dhe adoleshentë nga komuniteti Druze. Hezbollahu nga ana tjetër ka mohuar përgjegjësinë.

Ky ishte incidenti më vdekjeprurës ndërkufitar në muajt e fundit të shkëmbimeve të zjarrit midis dy palëve.

Sulmi ka rritur frikën se përplasjet e përmbajtura deri më tani mund të shkojnë në një luftë të përgjithshme.

Qeveritë perëndimore po i kërkojnë Izraelit të tregojë përmbajtje në reagimin e tij.

Shtëpia e Bardhë tha se kishte qenë në “diskutime të vazhdueshme me homologët izraelitë dhe libanezë që nga sulmi i tmerrshëm” në fushën e lojës në qytetin Druze të Majdal Shams.

Të hënën në mëngjes një sulm me dron izraelit jashtë qytetit libanez Shaqra, rreth 6.5 km (katër milje) nga kufiri izraelit, vrau dy persona, tha media shtetërore e Libanit. Hezbollahu njoftoi se të vdekurit ishin dy nga luftëtarët e tij. Izraeli ende nuk e ka komentuar raportin.

Ndërkohë Air France është bërë linja ajrore më e fundit që ka pezulluar fluturimet drejt dhe nga Bejruti, ndërsa pritjet për hakmarrjen izraelite rriten. Lufthansa, Sëiss International Air Lines dhe Euroëings kanë pezulluar në mënyrë të ngjashme fluturimet.

Në Majdal Shams, funeralet e viktimave u zhvilluan të dielën mes skenave të pikëllimit. Mijëra njerëz u mblodhën ndërsa arkivolet, të veshura me të bardha, u transportuan nëpër qytet.

LEXONI GJITHASHTU:

• Frikë për përhapje të luftës, a mund të ketë një përplasje të re Izrael-Hezbollah?
• Izraeli: Hezbollahu shkeli të gjitha vijat e kuqe me sulmin në Golan