Kampioni italian firmos me ekipin e Petronas Yamaha, Rossi edhe një vit në MOTO GP

Piloti italian i MOTO GP, Valentino Rossi do të vazhdojë të garojë edhe në sezonin e ardhshëm.

“Doktori” firmosi një rinovim një vjeçar me ekipin e Petronas Yamaha që rrjedhimisht  hedh poshtë spekulimet mbi një tërheqje të mundshme në fund të këtij sezoni.

Gjiganti japonez, Yamaha bëri të ditur se 41-vjeçari, fitues i 7 titujve kampion në MOTO GP, gëzon mbështetjen e plotë të skudrës dhe do të ndërrojë vendet me pilotin francez, Fabio Kuartararo, i cili do të garojë përkrah spanjollit Maverik Vinjales.

 “Jam shumë i lumtur dhe shumë krenar për këtë vendim pasi unë dëshiroj të vazhdoj të garoj. Ky është një sezon i çuditshëm, dhe plani im në fillim ishte që do shihja nëse jam ende kompetitiv dhe më pas do flisnim me Yamaha-n dhe ekipin e e Petronas. Por është shumë lajm i mirë. Kam kohë që qëndroj me Yamaha dhe mendoj se kjo lëvizje do të jetë e mirë për mua. Falënderoj ekipin dhe Yamaha-n për mbështetjen që më japin”,- tha në fjalën e tij Valentino Rosii.

Piloti italian mban rekordin për sa i përket numrit të garave në këtë garë, teksa në 20 vite karrierë, “doktori” ka arritur të triumfojë 89 herë në kategorinë e MOTO GP.