Kandidati i PS, Benet Beci: Shkodra duhet të dalë nga koncepti i bastionit për t’u bërë pjesë e zhvillimit

Benet Beci, numri 3 për Partinë Socialiste në Qarkun e Shkodrës tha për gazetaren Ilva Tare se e ndërmori iniciativën për të garuar në zgjedhjet e 25 prillit pas një karriere të gjatë menaxheriale, pasi sipas tij ishte koha për një transformim rrënjësor edhe në Shkodër.

“Politikën e shoh si një derë për të avancuar po në të njëjtën linjë të zhvillimeve dhe transformimeve që kemi bërë me vite, por nga një këndvështrim tjetër,” u shpreh z. Beci.

Kandidati e përshkroi fushatën si të qetë, ndërsa u shpreh optimist për rezultatet e pritshme të PS, në qarkun të cilin Tare ia rikujtoi se është bastion i kundërshtarëve demokratë.

“Shkodra ka nevojë të dalë nga koncepti i bastionit, i stanjacionit drejt një zhvillimi, ku urat janë mesazhi që duhet të japim për bashkëpunimin, ku qyteti është më i rëndësishëm sesa mendimi për politikën. Flamuri i qytetit është shumë më i mirë se ai i bastionit,” u shpreh z. Benet Beci.

“Shoh që njerëzit duan të dalin të votojnë PS, se e ka provuar në këto vite se bën ndryshime rrënjësore që të kemi mundësi ta fusim Shkodrën në ritmin e zhvillimin e vendit”, shtoi kandidati i PS në Shkodër.

Ai u shpreh se ndryshe nga ç’mund të shihet ditët e fundit të fushatës në qytete të ndryshme të Shqipërisë, situata në Shkodër duket e qetë, madje ai nënvijëzoi se pak më herët kishte zhvilluar një takim me një prej rivalëve të tij politik në një nga zyrat elektorale të PD.