Kaos në Francë, sektori publik në grevë për paga dhe kushte më të mira

Franca është përfshirë nga një grevë kombëtare e sektorit publik, punonjësit e të cilit kërkojnë rritje të pagave për t’i bërë ballë inflacionit në rritje. Greva ka shkaktuar probleme të shumta kryesisht për udhëtarët në Paris.

Duke pritur çoroditje të sistemit të transporteve, shumë parizienë dolën me biçikleta ose shkuan në punë në këmbë.

“Synimi për të pasur zero metro dhe zero trena rajonalë u arrit këtë të enjte. Këtu në Paris, shumë stacione janë të mbyllura për publikun dhe një fluks i madh i trafikut pritet të verifikohet në orën e pikut.

Kjo është një lëvizje e cila sapo ka filluar, sipas shumë sindikatave të punës që thonë se kjo lëvizje sociale do të zgjerohet në javët dhe muajt e ardhshëm, sidomos nëse kërkesat e punonjësve nuk dëgjohen.

Punëtorët që pritet të mbushin rrrugët e Parisit dhe qyteteve të tjera të mëdha të Francës kërkojnë paga më të larta, kushte më të mira pune dhe mbi të gjitha rritjen e presionit ndaj administratës së presidentit Emmanuel Macron, sidomos në lidhje me sistemin e pensioneve.

Në vend janë bërë edhe thirrje për greva të tjera, përfshirë një për afat të pacaktuar, duke filluar nga java e ardhshme.

LEXONI GJITHASHTU

• Vijon greva e naftëtarëve në Francë, kaos në pikat e karburanteve
• Pilotët e Lufthansës po planifikojnë një grevë tre-ditore
• Inflacioni në rritje, punëtorët në Mbretërinë e Bashkuar në grevë