Kaos tek Drejtoria e Policisë, protestuesit revoltë për vrasjen e të riut Klodian Rasha

Grupet e të rinjve që protestojnë që nga pasditja e sotme për vrasjen e të riut Klodian Rasha nga një efektiv policie, janë zhvendosur në orët e mbrëmjes në drejtim të Drejtorisë së Policisë së Tiranës ku u kanë vënë flakën koshave të plehrave dhe kanë shkatërruar dekorimet e vendosura nëpër rrugë nga bashkia për festat e fundvitit.

Policia është përgjigjur duke hedhur ujë me presion në drejtim të tyre me anë të një autoboti që ishte pozicionuar në rrugën që të çon për tek drejtoria e policisë.

Gazetari i Euronews Albania, Merin Maçi raportoi se një pjesë e protestuesve u shpërndanë pas ndërhyrjes së policisë edhe me gaz lotsjellës, por një numër prej 200-250 prej tyre vijojnë të qëndrojnë në rrugën ‘Myslym Shyri’, në përpjekje për të arritur Drejtorinë e Policisë.

Ai tha se për shkak të situatës së krijuar, pjesa më e madh e bizneseve të zonës kanë mbyllur qepenat. Në zonë kanë qenë edhe shërbimet zjarrfikëse që kanë ndihmuar në shuarjen e zjarreve të vendosura nga protestuesit nëpër koshat e mbeturinave, ndërsa duket se moti i pafavorshëm me shi ka bërë që numri i të rinjve të grumbulluar të vijë në rënie.

Gazetari i Euronews Albania bëri me dije se ka pasur thirrje për një tjetër protestë pas orës 22:00 të mbrëmjes së sotme, por nga ana e policisë thuhet se do të merren të gjitha masat për të mos lejuar asnjë veprim antiligjor.

Lexoni gjithashtu:

LIVE l A po fshihet e vërteta e vrasjes së 25-vjeçarit? Ekspertët dhe gazetarët debat në ‘Ilva Now’

Vrasja e 25-vjeçarit, Basha: Përgjegjës s’është vetëm efektivi, Rama dhe Lleshaj të dorëhiqen