“Kemi një marrëveshje”: BE do të reduktojë emetimet me të paktën 55% deri në 2030

Liderët e Bashkimit Europian dhe negociatorët e Parlamentit kanë arritur në një marrëveshje për të ligjëruar objektivat e unionit për të qenë neutral ndaj karbonit deri në vitin 2050 e për të reduktuar emetimet e gazrave serë me të paktën 55 për qind krahasuar me shifrat e viteve 1990.

Ligji Europian i Klimës tashmë duhet vulosur nga Parlamenti si dhe Këshilli në mënyrë që të hyjë në fuqi.

“Jemi shumë të kënaqur me marrëveshjen e përkohshme të arritur sot”, tha Joao Pedro Matos Fernandes, ministri portugez i Mjedisit.

“Ligji Europian i Klimës është “ligji i të gjithë ligjeve” që do të kornizojë legjislacionin mbi klimën për 30 vitet e ardhshme”, shtoi ai.

Njoftimi erdhi në orët e para të mëngjesit në prag të samitit ndërkombëtar të klimës së organizuar nga Presidenti i SHBA Joe Biden.

Frans Timmermans, zv-Presidenti Ekzekutiv i Komisionit për Marrëveshjen e Gjelbër e ka përshëndetur marrëveshjen dhe e cilësoi si një “moment historik për BE”.

“Sot është një ditë e mirë për njerëzit dhe planetin”, shtoi ai.

Brukseli prezantoi Marrëveshjen e Gjelbër Europiane në dhjetor të vitit 2019, e më pas propozoi Ligjin Europian të Klimës në mars 2020. Ky ligj synon që të kthejë Europën në kontinentin e parë neutral ndaj karbonit deri në 2050.

Lexoni gjithashtu 

• Kërcënimi nga klima, Bill Gates për Euronews: Më i rrezikshëm se kriza e pandemisë
• Marrëveshja e Gjelbër: Plani i Europës për t’u bërë kontinenti i parë në botë neutral ndaj karbonit
• BE-ja prezanton planin prej 1 trilion eurosh për ta bërë Europën neutrale nga karboni