Kërcënimet e demokratëve për ICE, reagon Trump: Nuk duam mbyllje të qeverisë

Presidenti amerikan, Donald Trump këtë të enjte po zhvillon një mbledhje të kabinetit të tij. Trump gjatë fjalës së tij përmendi kërcënimet e Demokratëve për mbylljen qeverisë. Ky kërcënim nga Demokratët e Senatit vjen pas masave të ashpra të marra nga administrata Trump ndaj emigracionit.

Trump u shpreh se po punon për të mos patur mbyllje të qeverisë teksa theksoi se ata nuk e duan një gjë të tillë.

“Shpresojmë të mos kemi një mbyllje dhe po punojmë për këtë tani. Mendoj se po i afrohemi. Demokratët, nuk besoj, duan ta shohin këtë gjithashtu.

Pra, besoj se do të punojmë në një mënyrë shumë dypartiake, për të mos pasur një mbyllje. Ne nuk duam një mbyllje”, tha ai.

Një mbyllje e qeverisë federale do të thotë që të gjitha funksionet jo-thelbësore të qeverisë janë të ngrira. Kjo do të ndikojë në gjithçka, nga sigurimet shoqërore te udhëtimi ajror e deri te qasja në parqet kombëtare.

Agjencitë federale varen nga financimi i miratuar nga Kongresi për t’i lejuar presidentit të nënshkruajë legjislacionin e buxhetit për vitin fiskal të ardhshëm.