Këtë javë, kryeministri Kurti pritet të takohet me presidentin Macron

Kryeministri Albin Kurti, gjatë kësaj jave do të zhvillojë takimin e parë me presidentin francez, Emmanuel Macron.

Kështu ka njoftuar zyra e kryeministrit, pas takimit që Kurti mbajti dje me këshilltaren politike për Ballkanin të presidentit francez Emmanuel Macron, Isabelle Dumont, ambasadoren e Francës në Kosovë, Marie-Christine Butel, këshilltarin në Drejtorinë e Evropës Kontinentale në Ministrinë e Punëve të Jashtme të Francës, Guillaume Rousson dhe këshilltarin e parë në ambasadë, Cyprien François.

Siç njoftohet, temë diskutimi ishte edhe vizita e fundit e kryeministrit Kurti në Bruksel për kapitullin e ri të dialogut me Serbinë.

Sipas zyrës së kryeministrit, ky takim u mbajt në përgatitje të vizitës së Kurtit në Paris, ku pritet të zhvillohet takimi i parë me presidentin Macron.

Rreth tre muaj më parë, presidenti i Francës, Emmanuel Macron i dërgoi një letër kryeministrit Albin Kurti, përmes së cilës e uroi atë për postin dhe i kërkoi që të mos e ndërpresë dialogun me Serbinë.

Sakaq, nëpërmjet kësaj letre Macron e ftoi Kurtin për një vizitë zyrtare në Francë.

“Unë dëshiroj t’ju siguroj për mbështetjen e Francës për të gjitha këto prioritete, për të mirën e kosovarëve dhe për afrimin të vendit tuaj me Evropën. Unë do të isha shumë i lumtur t’ju mirëprisja në Paris së shpejti për të diskutuar rreth këtyre temave,” – thuhej në letër.

LEXONI GJITHASHTU:

• Kurti takohet me këshilltaren politike për Ballkan të Presidentit Macron
• Agjenda e dialogut pritet të hartohet para takimit të radhës Kurti-Vuçiç
• Dialogu me Serbinë, Visar Ymeri kritika Kurtit: Njësoj si Thaçi, po dëmton konsensusin mes palëve