Kina hedh poshtë pretendimet e Netanyahut për mbështetje ndaj Iranit

Kina të martën hodhi poshtë pretendimet se Pekini i ka ofruar mbështetje Iranit në prodhimin e raketave.

“Ne kundërshtojmë akuzat që nuk bazohen në fakte”, u tha gazetarëve në Pekin zëdhënësi i Ministrisë së Jashtme kineze, Guo Jiakun.

Guo iu përgjigj një pyetjeje në lidhje me vërejtjet e raportuara nga kryeministri izraelit Benjamin Netanyahu, i cili pretendonte se Kina “i ofroi mbështetje Iranit në disa pjesë specifike në prodhimin e raketave”.

“Ne e kemi bërë të qartë qëndrimin e Kinës në shumë raste. Si një vend i madh dhe përgjegjës, Kina gjithmonë përmbush detyrimet e saj ndërkombëtare. Ne jemi të përkushtuar në promovimin e deeskalimit dhe bisedimeve të paqes për t’i dhënë fund konfliktit”, shtoi ai.

Izraeli dhe SHBA-të nisën sulme kundër Iranit më 28 shkurt, duke shkaktuar hakmarrje nga Teherani që synonte bazat dhe asetet amerikane në Lindjen e Mesme.

SHBA-të e kanë akuzuar Kinën për mbështetjen e Iranit dhe kanë vendosur sanksione ndaj rafinerive të naftës, si dhe firmave të imazheve satelitore.

Më shumë se 3,300 njerëz u vranë dhe dhjetëra mijëra u zhvendosën në Iran.

Të paktën 13 ushtarë amerikanë u vranë dhe dhjetëra të tjerë u plagosën gjatë konfliktit, i cili u ndal më 8 prill pasi Pakistani siguroi një armëpushim midis palëve ndërluftuese.