Kina i kërkon SHBA-së të respektojë interesat e saj

Pekini i bëri thirrje Uashingtonit të respektojë interesat thelbësore të Kinës dhe të mbështesë parimin e “një Kine”, ndërsa presidenti kinez Xi Jinping po përgatitet për një vizitë në Shtetet e Bashkuara gjatë muajit shtator.

Mesazhi u përcoll nga ministri i Jashtëm i Kinës, Wang Yi, gjatë një takimi me Sekretarin amerikan të Shtetit, Marco Rubio, në margjinat e samitit të ministrave të Jashtëm të ASEAN-it në Manila.

Sipas agjencisë shtetërore kineze Xinhua, Wang theksoi se SHBA duhet të menaxhojë në mënyrë të duhur mosmarrëveshjet dhe të marrë parasysh shqetësimet legjitime të Pekinit. Ndërkohë, të dyja palët e cilësuan takimin si “praktik, pozitiv dhe konstruktiv”, duke konfirmuar se kanë rënë dakord të përgatisin fazën e ardhshme të shkëmbimeve të nivelit të lartë mes dy vendeve.

Takimi vjen vetëm pak ditë pasi presidenti amerikan Donald Trump akuzoi Kinën për ndërhyrje në zgjedhjet në SHBA, pretendime që Pekini i ka mohuar, ndërsa janë kundërshtuar edhe nga shumë ekspertë amerikanë të sigurisë zgjedhore.