Kina pezullon tarifat portuale për 1 vit ndaj anijeve amerikane

Pekini ka njoftuar pezullimin për një vit të tarifave portuale “speciale” që ishin vendosur ndaj anijeve amerikane, në një tjetër sinjal pajtimi mes dy fuqive ekonomike më të mëdha në botë.

Sipas Ministrisë Kineze të Transportit, pezullimi hyri në fuqi të hënën, në orën 13:01 me orën lokale.

Tarifat kishin prekur anijet në pronësi ose të operuara nga kompani dhe organizata amerikane, që prej vendosjes së masave ndëshkuese në kulmin e luftës tregtare mes SHBA-së dhe Kinës.

Autoritetet kineze theksuan se vendimi vjen pas takimit të 30 tetorit mes presidentëve Donald Trump dhe Xi Jinping, ku palët ranë dakord të tërhiqen nga disa masa ndëshkuese dypalëshe.

Në të njëjtën linjë, Ministria Kineze e Tregtisë njoftoi sot se pezulloi për një vit sanksionet ndaj pesë degëve amerikane të gjigantit korean të ndërtimit të anijeve Hanëha Ocean.

Sanksionet ishin vendosur më 14 tetor, pasi Kina i akuzoi këto kompani për “kontribut në hetime që dëmtonin sovranitetin dhe sigurinë kineze”.

Pekini e justifikoi vendimin e sotëm si përgjigje ndaj masave të ngjashme që Uashingtoni kishte hequr më herët kundër sektorit kinez të ndërtimit të anijeve dhe transportit detar.

LEXONI GJITHASHTU:

• Trump: Rusia dhe Kina po kryejnë teste bërthamore, SHBA duhet të reagojë
• SHBA dhe Kina arrijnë marrëveshje për kuadrin tregtar para takimit të liderëve