Klima zgjedhore, Gerta Meta: Shqiptarët mbajnë mëri me familjen dhe jetën e japin për partitë

Drejtuesja e Koalicionit të Vëzhguesve Vendorë, Gerta Meta, tha se klima tërësore e zgjedhjeve parlamentare të 25 prillit ishte e tensionuar dhe partitë nuk kishin përmbajtje në programet elektorale.

Ajo pohoi në “Ilva Now” se tek shqiptarët vihet re një dukuri e çuditshme, kur tha se me familjarët e tyre janë gati të mbajnë mëri të gjata, ndërsa kur vjen puna për partinë e japin edhe jetën.

Këtë logjikë ajo e bazoi tek ngjarja e Elbasanit, ku pas një përplasjeje me armë mbeti i vdekur shtetasi, Pjerin Xhuvani.

“Klima e tensionuar dhe me raste ekstreme, që shkuan deri me humbje jete. Shqiptarët mbajnë mëri të gjata në familjet e tyre dhe kur vjen puna për të dhënë jetën për partitë e japin”,  tha ajo.

Ajo kritikoi edhe punonjësit e administratës publike, të cilët sipas znj.Meta morën pjesë masivisht në fushatë në kundërshtim me Kodin Zgjedhor.

“Administrata ka qenë e tëra në terren dhe ka pasur denoncime në KQZ. Kodi këtë radhë kishte një risi në lidhje me përdorimin e administratës të shkruar shumë qartë, që katër muaj para zgjedhjeve disa aktivitete ishin të ndaluara, por që qeveria dhe eksponentë të qeverisë i kishe në terren dhe nuk i kishe në punë”, shtoi ajo.

Lexoni gjithashtu:

Aleksandër Çipa dhe Ylli Manjani nxjerrin dy gabimet kryesore të opozitës më 25 prill

Çipa: Opozita duhet të jetë e bashkuar përballë pushtetit, loja individuale i dëmton

Ylli Manjani: Meta ka vënë një bast publik, duhet të japë dorëheqjen

Endrit Shabani tregon se si sistemi aktual zgjedhor i tjetërson votat e shqiptarëve pa u numëruar fare