Koalicioni kundër ISIS, Xhaçka: Lufta ndaj ekstremizmit të dhunshëm, prioritet i vendit në Këshillin e Sigurimit

Ministrja për Evropën dhe Punët e Jashtme, Olta Xhaçka, mori pjesë në takimin e ministrave të Jashtëm të Koalicionit Global kundër ISIS (D-ISIS), që u mbajt sot në Romë, nën bashkë-kryesimin e Departamentit Amerikan të Shtetit dhe Ministrisë së Jashtme të Italisë.

Në fjalën e saj, ministrja Xhaçka evidentoi rolin dhe kontributin e Shqipërisë në kuadër të forcimit të paqes dhe sigurisë në botë, si dhe nxitjes së bashkëpunimit dhe zhvillimit.

“Vendi ynë e ka luftën e ekstremizmit të dhunshëm një ndër prioritetet tona gjatë anëtarësisë në Këshillin e Sigurimit të OKB-së për periudhën 2022-2023”, tha ministrja Xhaçka.

Ajo rikonfirmoi mbështetjen dhe angazhimin e Shqipërisë në rindërtimin e paqes në zonat e konfliktit.

Përfaqësues të lartë të 73 vendeve anëtare në koalicion shprehën angazhim të mëtejshëm, që, në bashkëpunim me Kombet e Bashkuara dhe me organizata e partnerë të tjerë ndërkombëtarë, të vazhdojnë rritjen e kontributeve humanitare dhe mbështetjen financiare, me qëllim forcimin e stabilitetit dhe sigurisë në zonat e çliruara dhe parandalimit të ringritjes së ISIS.

LEXONI GJITHASHTU: 

• Shqipëria zgjidhet anëtare e përkohshme e Këshillit të Sigurimit në OKB
• Shqipëria anëtare e Këshillit të Sigurimit në OKB, reagojnë politikanët dhe ambasadorët