Kodimi tek të rinjtë, Shqipëria prezanton planin digjital në Samitin Ballkanik

Perspektiva digjitale e Ballkanit Perëndimor ishte në fokus të samitit të katërt të organizuar në Mal të Zi së fundmi.

Linda Karçanaj, drejtore e Agjencisë Kombëtare të Shoqërisë së Informacionit theksoi nevojën e digjitalizimit të arkivave, platformat online të shërbimeve shtetërore për qytetarët dhe bizneset, si dhe investimin tek aftësimi për të rinjtë.

Sipas Karçanajt, Shqipëria po inicion sfida të reja për digjitalizimin, nga përdorimi i inteligjencës artificiale për shërbime më cilësore, te krijimi i shkollave të kodimit për të rinjtë shqiptarë duke nisur nga viti i ardhshëm ku do nisin 1 mijë të rinjtë e parë.

“Planet tona për avancimin e digital skills në Shqipëri do të fokusohen veçanërisht në zhvillimin e burimeve njerëzore dhe talenteve në kodim, nëpërmjet modelit Boot Camp dhe shkollave të kodimit, nga ku synojme të kemi brenda vitit të ardhshëm 1,000 kodues të rinj dhe 3,000 në vitin 2023. Në fokus kemi gjithashtu ndryshimin e kurrikulës mësimore me përfshirjen e kodimit dhe IT-së që nga klasa e parë me qëllim përhapjen masive të kodimit tek nxënësit.”, tha Karçanaj në Podgoricë.

Në Samit u vlerësua inicitiava e heqjes së Roaming në vendet e Ballkanit Perëndimor dhe së shpejti e njëjta iniciativë do të ndiqet edhe me vendet e Bashkimit Europian duke krijuar një lehtësi të madhe për qytetarët shqiptarë që udhëtojnë në BE.

Gjithashtu u nënshkruan dy marrëveshje të reja bashkëpunimi mes vendeve ballkanike për të rritur ndërveprimin digjital.