“Koha të kthehem në shtëpi”, Thaçi liron nga detyra ambasadoren e Kosovës në SHBA

Presidenti i Kosovës, Hashim Thaçi, ka nënshkruar dekretin për tërheqjen e Vlora Çitakut si ambasadore në Shtetet e Bashkuara të Amerikës.

Sipas dokumenteve të siguruara nga Euronews Albania, mësohet se ka qenë vetë ambasadorja Çitaku, e cila ka kërkuar lirimin nga detyra më 24 shtator.

“Duke shprehur konsideratën më të lartë për ju dhe institucionet e Republikës së Kosovës, përmes kësaj letre kërkoj të lirohem nga detyra si Ambasadore e Republikës së Kosovës në Shtetet e Bashkuara të Amerikës”, thuhet ndër të tjera në letrën e ambasadores Vlora Çitaku drejtuar presidentit të Republikës së Kosovës.

Kjo kërkesë ka vënë menjëherë në lëvizje kreun e shtetit, i cili ka nxjerrë një dekret përmes të cilit ka urdhëruar lirimin nga detyra të ambasadores në SHBA. Dekreti në fjalë është firmosur nga presidenti Thaçi më 2 tetor dhe ka hyrë në fuqi po atë ditë.

“Urdhërohet tërheqja e znj. Vlora Çitaku nga pozita e Ambasadores/Shefes së Misionit diplomatik të Republikës së Kosovës në Shtetet e Bashkuara të Amerikës, me seli në Uashington”, thuhet në dekretin e z. Thaçi.

Ambasadorja Vlora Çitaku në këtë letër shkruan se ka qenë nder dhe privilegj, që ka përfaqësuar Kosovën në një prej shteteve, i cili ka investuar shumë në shtetndërtimin dhe konsolidimin e Kosovës.

“Është zyrtare! Pas më shumë se pesë vitesh në Washington DC, erdhi koha që unë të kthehem në shtëpi.Përfaqësimi i Kosovës në SHBA ka qenë nderi i jetës sime.Dua të falënderoj institucionet e Republikës së Kosovës për besimin e dhënë ndaj meje gjatë kësaj kohe”, shkruan Çitaku në “Facebook”. 

Me qëllim mbarëvajtjen e misionit diplomatik në SHBA, Presidenti i Kosovës thekson se ambasadorja Çitaku do të qëndrojë në detyrë deri në zëvendësimin e saj.