Kolaudimi i automjeteve njëherë në dy vjet kërkon ndryshimin e Kodit Rrugor

Në vitin 2019 zyrtarisht në Shqipëri qarkulluan 626 mijë automjete. Burime zyrtare nga kompania koncesionare SGS i thanë Euronews Albania se mbi 160 mijë automjete nuk kaluan kontrollin e parë teknik duke u rikthyer për ri-kontroll.

E thënë ndryshe 25% e numrit total të flotës së automjeteve ose ¼ e tyre “ngelën”. Ndërkohë me përfundimin e koncesionit, i cilësuar absurd nga qeveria aktuale, ky shërbim do t’i kthehet shtetit duke filluar nga janari.

Teknikalitetet ende nuk janë bërë me dije, por kalimi i kolaudimit për mjetet e përdorura një herë në dy vjet bie ndesh me Kodin Rrugor.  

Zyrtarë të policisë rrugore thanë për Euronews Albania se për këtë duhet ndërhyrë në ndryshimin e kodit ndërsa ekspertët e sigurisë rrugore janë të ndarë në mendime sa i takon periudhës së kontrollit një herë në dy vjet.

Për disa kjo është një praktikë e njohur në shumicën e vendeve europiane ku dëshiron të aderojë edhe Shqipëria, ndërsa të tjerë e shikojnë me skepticizëm për shkak të flotës së vjetër të automjeteve në Shqipëri dhe mungesës së kulturës nga ana e drejtuesve të automjeteve për t’i mirëmbajtur ato.

Ndërkohë, qeveria ka lajmëruar se tarifat aktuale nuk do të rriten, megjithëse afati i vlefshmërisë se kontrollit teknik do të zgjatet.