Komisionerja e BE, Kos: SPAK institucioni më i besuar, duhet mbrojtur dhe forcuar

Komisionerja e Bashkimit Evropian për Zgjerim, Marta Kos, iu drejtua të martën deputetëve në Parlamentin Evropian duke theksuar rëndësinë e mbrojtjes së pavarësisë së SPAK-ut dhe përshpejtimit të negociatave të anëtarësimit të Shqipërisë në BE, sipas raportit të progresit për vitet 2023–2024.

“SPAK është sot institucioni më i besuar në vend. Kjo duhet mbrojtur dhe forcuar,” tha Kos, duke vlerësuar angazhimin e reformës në drejtësi, sidomos të Strukturës Kundër Krimit të Organizuar dhe Korrupsionit.

Ajo theksoi se bisedimet me Shqipërinë po ecin me shpejtësi, megjithëse ende ka punë për t’u bërë:

“Ky raport vjen në një moment vendimtar, pasi negociatat e anëtarësimit mes Shqipërisë dhe BE-së po ecin me një ritëm të paparë më parë, me disa arritje të rëndësishme të përmbushura në muajt e fundit dhe të tjera që priten. Kjo tregon se Shqipëria është angazhuar seriozisht në procesin e zgjerimit, ndërsa BE-ja po vepron duke respektuar qasjen e bazuar në meritë. Ne po punojmë ngushtë me Presidencën daneze për të mbajtur ritmin. Besojmë se edhe dy grupet e mbetura do të hapen sapo të jetë e mundur.”

Në përfundim, Kos nënvizoi se në kontekstin aktual gjeopolitik, Shqipëria dhe Ballkani Perëndimor mbeten një prioritet gjeostrategjik për BE-në.

Të dy raportet e progresit për Shqipërinë në dy vitet e fundit do të miratohen këtë të mërkurë.