Komisioni Evropian 115 milionë euro ndihmë, 1 vit pas tërmetit vijojnë programet e ‘BE për Shkollat’ dhe ‘BE për Kulturën’

Një vit më parë Shqipëria u godit nga një tërmet i fuqishëm prej 6.4 i shkallës Rihter që shkaktoi viktima të konsiderueshme, si dhe dëmtime të mëdha të pronës publike dhe private, përfshirë objekte arsimore dhe monumente të trashëgimisë kulturore.

Komisioni Evropian dha 115 milionë euro në grante për të mbështetur rindërtimin. Programi “BE për Shkollat” ofron 75 milionë euro për të rindërtuar dhe riparuar  58 objekte arsimore në 11 bashkitë e prekura nga tërmeti nga  UNDP.

Programi “BE për Kulturën” ofron 40 milionë euro për rehabilitimin e siteve të trashëgimisë kulturore nga UNOPS.

Ambasadori i BE-së në vendin tonë, Luigi Soreca teksa vizitoi në fillim të kësaj jave dy nga shkollat që aktualisht po riparohen dhe rindërtohen në Durrës dhe Krujë, tha se që nga dita e parë, Bashkimi Evropian ka qenë vazhdimisht në vijën e parë të frontit për të ndihmuar Shqipërinë.

“Shkollat janë simboli i vërtetë i rimëkëmbjes për shoqërinë dhe ofrojnë një fillim të ri për fëmijët e prekur nga shkatërrimi i shkollave të tyre.

Kantieret e ndërtimit që vizitova janë mishërimi i lidhjeve të forta të solidaritetit mes qytetarëve të BE-së dhe të Shqipërisë. Që nga dita e parë, Bashkimi Evropian ka qenë vazhdimisht në vijën e parë të frontit për ta ndihmuar Shqipërinë”, u shpreh ambasadori i BE në vendin tonë.