Komiteti Hetimor rus kërkon informacion për vdekjen e 4 turistëve

Vdekja e 4 turistëve rusë në një hotel në fshatin Qerret në Kavajë ka shkuar deri në nivelet më të lartë të Moskës.

Alexander Bastrykin, kreu i Komitetit Hetues të Rusisë, ka udhëzuar Departamentin Kryesor të Hetimit dhe Mjekësinë Ligjore për të marrë informacion nga autoritetet kompetente të Shqipërisë dhe të raportojë për të gjitha rrethanat e vdekjes të shtetasve rusë.

Të premten e 15 tetorit katër turistë rusë, 2 burra dhe 2 gra u gjetën të pajetë brenda një saune në një hotel në zonën e Qerretit, Kavajë.

2 dhomat e hotelit ku qëndruan turistët i janë nënshtruar këqyrjeve të eksperteve, ndërsa grupi hetimit po pret përgjigje e disa analizave dhe raportit final të ekspertizës mjeko-ligjore.

Nuk dihet se çfarë procedure do të ndiqet për tërheqjen e trupave nga morgu, ndërkohë hetuesit kanë pyetur edhe turistët e tjerë të grupit qe kishin vizituar Shqipërinë.

Dyshohet se viktimat u asfiksuan nga qëndrimi më gjatë se ç’duhet në ambientet e saunës, por hetimet lidhur me shkaqet e ngjarjes vijojnë.

Për këtë ngjarje të rëndë ka pasur edhe një reagim nga ambasada ruse në Tiranë, e cila ka theksuar se pret një hetim të plotë nga pala shqiptare për shkaqet e vdekjes së shtetasve rusë.

LEXONI GJITHASHTU:

• Prokuroria e Kavajës regjistron si vrasje, vdekjen e 4 turistëve rusë
• Vdekja e 4 turistëve në Qerret, reagon ambasada ruse