Konfrontimet në protesta, Endri Shabani i ashpër: Policia është çetë e armatosur

Kryetar i Nismës Thurje, Endri Shabani, komentoi zhvillimet e fundit në Shqipëri, ku një grup qytetarësh, kryesisht të rinj, protestuan për shtatë ditë radhazi si shenjë revolte për vrasjen e të riut Klodian Rasha.

Gjatë intervistës me gazetaren Ilva Tare në Euronews Albania, z. Shabani tha se Policia e Shtetit është kthyer një në çetë të armatosur, e cila nuk mbron qytetarin, por kryetarin e çetës.

“Brutaliteti i policisë nuk është thjesht mungesa e profesionalizimit. Në vendet autokratike kjo ndodh, dhe fatkeqësia është që në Shqipëri Policia është çetë e armatosur e atij që është në pushtet. Nuk përfaqëson shtetin, por përfaqëson kryetarin e çetës. Policia nuk është aty për të mbrojtur institucionet. Policia angazhohet për të fshehur gjurmët se janë bashkë. Mbrojnë njëri-tjetrin, veprojnë si një çetë e armatosur. Nuk kemi arritur të ndërtojmë  një polici të pavarur që të mbrojë institucionet, por kryetarin e çetës”, tha ai.

Ai përshëndeti reagimin e të rinjve në protestë, ndërsa kritikoi ato zëra, të cilët kanë ngritur alarmin se të rinjtë po thyejnë institucionet.

“U thanë se disa të rinjtë vandalë kanë dalë në rrugë dhe po na thyejnë pronën e përbashkët. Cilën pronë të përbashkëta? Të gjitha pasuritë e përbashkëta këtu janë privatizuar. Po na sulmojnë institucionet, cilat institucione? Institucionet nuk punojnë më për qytetarët. I riu sot është i distancuar si nga prona e përbashkët ashtu edhe nga institucionet”, tha ai.