Kongresi mund të bllokojë planin e Trump për tërheqjen e trupave nga Evropa

Plani i presidentit të Shteteve të Bashkuara, Donald Trump, për të reduktuar ndjeshëm numrin e trupave amerikane në Evropë mund të hasë pengesa serioze ligjore dhe politike.

Sipas raportimit të Fox News, një projektligj i fundit për mbrojtjen ndalon uljen e pranisë ushtarake amerikane nën 76 mijë trupa në kontinent, pa një analizë të detajuar rreziku.

Administrata duhet të provojë se një vendim i tillë nuk dëmton sigurinë kombëtare dhe interesat e NATO-s.

Edhe pse Kongresi nuk mund të vendosë veto direkte, ai kontrollon financimet dhe mund të kufizojë fondet për zhvendosjen e trupave, duke e bërë praktikisht të pamundur realizimin e planit.

Ekspertët theksojnë se infrastruktura ushtarake në Evropë është thelbësore për reagimin e shpejtë ndaj krizave dhe për frenimin e kërcënimeve, veçanërisht nga Rusia.

Aktualisht, pjesa më e madhe e trupave amerikane është e përqendruar në disa vende kyçe:

-Gjermani: rreth 36 mijë trupa

Megjithatë, kufizimet ligjore lidhen me numrin total të trupave në Evropë dhe jo me shpërndarjen e tyre sipas vendeve, çka i lë presidentit hapësirë për ripozicionime të brendshme.

Analistët paralajmërojnë se një tërheqje e nxituar mund të dobësojë efektin frenues të SHBA-ve dhe të japë sinjale të gabuara në një moment tensionesh të larta gjeopolitike.

Vetë Trump ka deklaruar se një pjesë e trupave do të kthehen në SHBA, ndërsa disa republikanë kanë kërkuar që ato të zhvendosen drejt Lindjes së Mesme.

Megjithatë, rezistenca në Kongres dhe kompleksiteti logjistik e bëjnë një tërheqje të shpejtë të vështirë, duke paralajmëruar një përplasje të mundshme politike në Washington.