Kontestohet mbreti Charles, monarku pritet me vërshëllima në katedralen e Edinburgut

Mbreti Charles i Tretë dhe mbretëresha Camilla mbërritën të mërkurën në katedralen e Edinburgut, për ceremoninë solemne të kurorëzimit skocez të monarkut.

Teksa hyri në objektin e kultit, Charles u prit nga duartrokitjet e mbështetësve të shumtë, por edhe nga disa thirrje kundër tij të bëra nga manifestues anti-monarki, që ishin përzjerë me turmën.

Më parë ishte zhvilluar korteu mbretëror përgjatë asaj që njihet si Milja Mbretërore, të cilës i parapriu ai i vullnetarëve të shërbimeve publike që shoqëruan deri në katedrale gurët e çmuar të kurorës, që mbaheshin në kështjellën e Edinburgut.

Në godinën e shenjtë hynë edhe princi William dhe bashkëshortja Kate, si dhe shumë mysafirë të tjerë.

Në qendër të kryeqytetit skocez u mblodhën mijëra fansa të çiftit mbretëror, por edhe shumë manifestues anti-monarki, të cilët ngrinin parullën “Ti nuk je mbreti im”.

Policia skoceze u tregua më tolerante krahasuar me atë londineze, që zgjodhi një linjë të ashpër me arrestime të shumta të protestuesve që kundërshtuan kurorëzimin e Charles-it të Tretë më 6 maj në kryeqytetin britanik.

LEXONI GJITHASHTU:

• Mbreti Charles punëson një grua me ngjyrë për të qenë këshilltare e tij
• Mbreti Charles III nderon Tina Turner, vendos këngën e saj në Buckingham Palace