Kontrolli ndaj Trump, prokurorët refuzojnë të publikojnë detajet e mandatit

Departamenti amerikan i Drejtësisë ka deklaruar se kundërshton publikimin e dokumentit që prokurorët përdorën për të siguruar dritën e gjelbër nga gjyqtari federal për kontrollin e resortit te ish-presidentit Donald Trump në Florida.

Përmes një komunikate, Departamenti i Drejtësisë ka argumentuar se një lëvizje e tillë do të kompromentonte hapat e ardhshëm hetimorë të çështjes.

Aleatët republikanë të Trump shtuan në ditët e fundit thirrjet drejtuar kryeprokurorit Merrick Garland për të publikuar dokumentin, që do të zbulonte provat që prokurorët i treguan gjykatësit për ta bindur atë se kishin motive të besonin se Trump kishte kryer krime kur kishte lënë detyrën.

Të premten e kaluar, me kërkesë të Departamentit të Drejtësisë, një gjykatë federale në Florida publikoi mandatin e kontrollit dhe dokumente të tjera ligjore që tregonin se agjentët e FBI-së ishin larguar me 11 dosje me informacion të klasifikuar nga resorti “Mar a Lago”.

Disa nga dosjet mbanin etiketën “top secret”, niveli më i lartë i klasifikimit i rezervuar për informacionet që kanë të bëjnë me sigurinë kombëtare të Shteteve të Bashkuara.

LEXONI GJITHASHTU

• Trump kërkon që t’i kthehen dokumentet e sekuestruara nga FBI në rezidencën e tij
• ‘E paprecedentë’, politologia: Kontrolli i FBI ndaj Trump-it ka shokuar amerikanët