Kontrollorët e Albcontrol apelojnë vendimin e “arrestit me burg”

Tre kontrollorët e arrestuar rreth një javë më parë, të akuzuar si organizator të protestës që solli edhe bllokimin e fluturimeve në aeroportin e Rinasit, kanë apeluar vendimin e shkallës së parë dhënë ndaj tyre.

Nëpërmjet avokatit të tyre mbrojtës, kontrollorët kanë depozituar këtë të mërkurë kërkesën për masë më të butë sigurie.

Rreth një javë më parë Gjykata e Tiranës, caktoi masën “arrest me burg”, ndaj kontrollorëve Armando Fezga dhe Muhin Mezin, ndërsa Flora Ndreca u la në “arrest shtëpie”.

Ndaj tyre është ngritur akuza e shpërdorimit të detyrës në bashkëpunim. Si provë kryesore ndaj tyre prokuroria ka përgjimet telefonike dhe sipas dosjes hetimore janë zbardhur të gjitha komunikimet që kontrollorët kanë kryer me njëri tjetrin në rrjetin social, WhatsApp.

Grupi i hetimit në bazë të bisedave ka arritur të provojë se Flora Ndreca, Alehando Fezga dhe Muhin Mezini kanë ndikuar tek kontollorët që të plotësojnë formularin për paaftësi të përkohshme në punë.

Në disa raste prokuroria thotë që të dyshuarit e kanë plotësuar formularin e paaftësisë edhe për kolegët e tyre ndërsa me ata që kanë kundërshtuar kanë bërë debate deri sa i kanë bindur për të firmosur.