Konviktet gati për të pritur studentët, më lirë se shtëpitë me qira

Konviktet po bëhen gati për të mirëpritur studentët, të cilët ndryshe nga vitet e tjera do duhet të jetojnë nën kushtet e pandemisë. Po cilat janë masat e marra? Drejtoresha e Rezidencës Studentore Universitare nr.2 në Tiranë, tregon se shtretërit në dhoma janë të ndara në bazë së hapësirës.

Ne kemi zbatuar një distancë që është teknike, e përcaktuar nga specialistët teknikë për sipërfaqe. Janë dy studentë në një dhomë, që duhet dhoma më e vogël e miniapartamentit dhe 3 studentë në dhomën më të madhe, kanë një tualet të përbashkët”, tha Zhanina Dapi

Por si do të veprohet në rast se një student shfaq shenja të covid-19?

“Njoftohet mjeku, i cili është i predispozuar për të qenë në dispozicion të studentit, nëse mjeku sugjeron se studenti ka diçka ndryshe nga normale, njoftohet 127 dhe vjen dikush që të marrë tamponin. Në dhomën e vet, pasi aty ka qëndruar derisa ka zbuluar simptomën dhe aty do të qëndrojnë derisa të marrim orientimet  e duhura”, shtoi ajo.

Ndërsa studentët që jetojnë në këto ambiente, duket se janë përshtatur me këtë mënyrë jetese.

“Ka 1 vit që po qëndroj përveç kohës së karantinës që qëndroj mbyllur. Kushtet janë shumë të mira, prandaj kam ardhur të jetoj këtu, mundohemi të mbajmë distancën”.

Të njëjtën gjë pohojnë dhe prindërit, të cilët sjellin fëmijët për t’u riregjistruar.

“Kushtet janë më të favorshme, duket që janë më të sigurta”

Ata tregojnë se shtëpitë me qira janë më të shtrenjta, ndaj për ta konviktet janë zgjidhja e vetme.