Korabi surprizon Tiranën, bardheblutë eliminohen nga Kupa e Shqipërisë

Klubi i futbollit të Korabit arriti të eliminojë nga Kupa e Shqipërisë Tiranën, rezultat surprizë ky për kampionët e vendit, të cilët i kanë bërë një nisje aspak të mirë këtij sezoni.

Ndeshja e luajtur të mërkurën në impiantin sportiv Skënder Halili, u mbyll pa gola dhe shkoi në pjesë shtesë, mirëpo kur u duk sikur gjithçka do të zgjidhej me njëmbëdhjetëmetërsha, Korabi shënoi golin e fitores me 22-vjeçarin Xhuliano Skuka në minutën e 119-të.

Për t’u vlerësuar është fakti se dibranët luajtën me një lojtar më pak prej minutës së 68-të, kur mbrojtësi Nikolin Duka u ndëshkua me kartonin e dytë të verdhë.

Kjo është humbja e dytë radhazi për Tiranën dhe e treta në pesë ndeshjet e fundit. Eliminimi nga kupa ka bërë që në mjediset bardheblu të qarkullojnë zërat e parë për një shkarkim të mundshëm të trajnerit Emmanuel Egbo, i cili pak muaj më parë e drejtoi ekipin drejt titullit të parë kampion të Shqipërisë pas dhjetë vitesh.

Në ndeshjet e tjera, Teuta konfirmohet si një skuadër mjaft e konsoliduar dhe me sa duket do të jetë pretendente në të gjitha frontet për këtë sezon.

Durrsakët fituan bindshëm 5-0 ndeshjen e kupës përballë Kastriotit, që këtë vit është pjesë e elitës së futbollit shqiptar.

Ndërkohë që për Partizanin mjaftoi një gol i xhamaikanit Brian Brown në minutën e 19-të për të kaluar në fazën tjetër pasi fitoi minimalisht 1-0 përballë Apolonisë.

Skënderbeu, nga ana tjetër, fitoi 3-0 me Pogradecin, Kukësi mposhti 2-1 Besën ndërkohë që Bylis u mund 2-1 nga Dinamo.