Korçë, përplasje për votën, simpatizantë të PD ndalojnë një makinë, policia i procedon

Një tjetër incident me dyshimet për shitblerje vote në sfond është shënuar në fshatin Podgorie të Korçës.

Sipas të dhënave nga Partia Demokratike, disa të rinj të angazhuar në ruajtjen e votës kanë ndaluar në mesnatë një makinë, ku janë gjendur lista e zgjedhësve te fshatit Podgorie.

Lista e shkruar me dorë me emra banorësh të këtij fshati dhe gjithnjë sipas Partisë Demokratike, këto materiale policia refuzoi t’i bëjë publike. Nga ana tjetër, policia ka dalë me një deklaratë ku duke sqaruar ngjarjen, ka referuar edhe procedimin penal në gjendje të lirë për 3 simpatizantë të Partisë Demokratike nën akuzën e “Njoftimi i rremë në organet e rendit” dhe “Pengimi i qarkullimit të mjeteve të transportit”.