Korrupsioni pengon biznesin, “AmCham”: Bëni transparencë në administratë, rajoni tërheq më shumë

Dhoma Amerikane e sheh korrupsionin si problemin më të madh që po cenon aktivitetin ekonomik në vend dhe kërkon luftë pa kompromis, me gjoba konkrete ndaj abuzuesve. Në publikimin e axhendës së investimeve 2021, biznesi amerikan liston një sërë rekomandimesh për qeverinë, ku përfshihet llogaridhënia për krijimin e besueshmërisë në publik.

“Aplikoni shërbime të përparuara ose plotësisht transparente për platformat publike për agjenci si Kadastra, Dogana, Administrata Tatimore dhe Prokurimi Publik”, lexohet në axhendën e Dhomës Amerikane.

Dhoma Amerikane i rekomandon qeverisë një strategji për tërheqjen e investimeve të huaja, monitoruar dhe implementuar nga nivelet më të larta në qeveri, duke shkurtuar proceset burokratike për të bërë investime.

“Shqipëria renditet me pikë të ulëta nga Banka Botërore për kohën që duhet për të përfunduar një investim. Maqedonia e Veriut dhe Serbia për shembull, kanë krijuar një proces më të shpejtë dhe ky është një faktor kryesor përcaktues edhe për investitorët e Dhomës Amerikane”, theksohet në axhendë.

Rekomandimet synojnë edhe krijimin e një sistemi transparent dhe pa ndikim politik tek prokurimet publike si dhe garantimin e konsultimit publik gjithëpërfshirës.

LEXONI GJITHASHTU:

• Klima e të bërit biznes, Arben Malaj thirrje qeverisë: Koha që të ketë ngrirje të çdo ndryshimi në nivel taksash
• Dhoma Amerikane e Tregtisë letër të hapur qeverisë: Të gjitha bizneset, pavarësisht nga madhësia të kenë akses në Fondet e Emergjencës