Kosova 60 mln euro për biznesin, fillon shpërndarjen e paketës për rimëkëmbjen

Qeveria e Kosovës filloi nga sot shpërndarjen e mjeteve nga Pakoja për Rimëkëmbjen Ekonomike. Me zbatimin e vendimit të Qeverisë të datës 28 shtator, me të cilin parashihej mbështetje direkte për sektorin privat, masat që janë parashikuar me këtë vendim janë hartuar në bashkëpunim të plotë me përfaqësues të bizneseve.

 Kryeministri Avdullah Hoti dhe ministrja e Financave, Hykmete Bajrami, deklaruan se ndihma siguron gjithpërfshirje. Ndihma përfshinë 37 mije biznese që janë kualifikuar për të qenë pjesë e kësaj pakoje. Këto biznese do të përfitojnë 60 milion euro.

Kryeministri Hoti deklaroi se përfituesit më të mëdhenj janë bizneset e vogla. Kështu, kompanitë që kanë deri në dhjetë punëtorë, përfitojnë 45.5% të shumës së përgjithshme të pakos prej 60 milion eurosh, kurse firmat që kanë nga 11 deri 50 punëtorë, 26%. Kurse pjesa tjetër, shpërndahet për pjesën tjetër të bizneseve.