Kosova duhej të merrte pjesë në Forumin e Shkupit, thonë njohësit e politikës në Prishtinë

Kryeministri i Shqipërisë Edi Rama shfaqi kritika ndaj Kosovës, kur foli gjatë Forumit Ekonomik të Shkupit.

Deklaratat e tij, u komentuan në mënyra të ndryshme nga njohës të politikës në Prishtinë, sidoqoftë ata ndanë mendime të përbashkëta se Kosova duhej të kishte gjetur një mënyrë për të marrë pjesë në Forum dhe për t’i qartësuar qëndrimet e saj rreth nismës “Open Balkan”.

Sipas analistit Halil Matoshi, mënyra se si foli Rama në Shkup “e dëmton politikisht Kosovën”. Por me këtë nuk pajtohet Valon Syla. Sipas këtij të fundit, “Rama është kryeministër i Shqipërisë dhe jo i Kosovës”.

Syla e konsideron “normale që Rama t’i ketë parësore interesat e shtetit të tij”. Pavarësisht “pikave të dobëta” ai pranon se ka interesa të mëdha ekonomike te projekti “Open Balkan” dhe se për këtë Kosova duhet bërë pjesë e kësaj nisme.

Sidoqoftë Syla thotë se Kosova duhet të vendosë kushtet e veta ndaj vendeve nismëtare, por që duhet bërë pjesë e saj. Ngjashëm thotë edhe Matoshi.

Të mërkurën në Shkup të Maqedonisë së Veriut, u mbajt takimi ku temë kryesore ishte i ashtuquajturi “Mini-Shengen”, që tashmë ka ndryshuar emër në “Open Balkan”.

Në takim morën pjesë kryeministri i Shqipërisë, Rama, Presidenti i Serbisë, Vuçiç, dhe kryeministri veriomaqedon Zaev. Në të munguan përfaqësuesit nga Kosova, Mali i Zi dhe Bosnjë e Hercegovina.

LEXONI GJITHASHTU:

• ‘Minishengeni nuk e ka miratimin tonë’, Kurti refuzon Forumin Ekonomik të Shkupit
• Kosova nuk duhet të vetë-izolohet nga nismat rajonale, thotë diplomati
• Minishengeni i shërben Serbisë, po largon Shqipërinë nga Kosova, thonë ekspertët në Euronews Albania