Kosova miraton buxhetin për vitin 2021, Gërxhaliu: Ky hap i qeverisë duhet përshëndetur

Qeveria e Kosovës në mbledhjen e saj të radhës ka miratuar buxhetin për vitin 2021. Pas një rishikimi të shpenzimeve, buxheti është përcaktuar në kuotën 2 miliardë e 516 milionë euro.

Mësohet se nëpërmjet këtij buxheti fokusi do të jetë në mposhtjen e pandemisë, si dhe rimëkëmbjen ekonomike pas pasojave të pandemisë.

Mes kërkesave specifike që janë parashtruar në mbledhjen e qeverisë, ka qenë ajo e Ministrisë së Mbrojtjes për blerjen e dronëve në një shifër prej 4.6 milionë dollarë, si dhe kërkesat e Ministrisë së Bujqësisë për një shumë prej 15 milionë dollarë për të përballuar nevojat e bujqësisë në vend.

Ish-kryetari i Odës Ekonomike të Kosovës, Safet Gërxheliu thotë se ky hap i qeverisë për të rishikuar buxhetin është akt i duhur, në një kohë që klima e përgjithshme ekonomike ka marrë goditje të fortë nga pandemia.

“Në Kosovë është duke dominuar agjenda politike se sa ajo ekonomike dhe rimëkëmbja, dhe besoj se një hap i tillë për rishikimin të buxhetit besoj se duhet të duartrokitet”, tha ai.

Ai thotë se në këto kushte, qytetarët dhe bizneset e vendit e kanë të domosdoshme dorën përkujdesëse të shtetit.

“Është një moment që duhet të jemi të orientuar në ekonomi dhe mbi të gjitha qytetarët dhe bizneset duhet të ndiejnë dorën e shtetit”, theksoi ai.

LEXONI GJITHASHTU:

• Albin Kurti: I qëndroj çdo deklarate të bërë për liqenin e Ujmanit
• Kosovë, pas Valdete Dakës tentohet shkarkimi i bordit të RTK-së