Kosova nuk raporton asnjë të vdekur nga COVID-19

Gjendja e epidemiologjike e COVID-19 në Kosovë prej ditësh ka hyrë në një fazë të qëndrueshme dhe kjo prirje bëhet e ditur nga të dhënat që raportojnë institucionet përgjegjëse.

Ministria e Shëndetësisë thotë se gjatë orëve të fundit nuk është shënuar asnjë humbje jete si pasojë e coronavirus, ndërsa nga kryerja e 1713 testimeve, 15 prej tyre janë konfirmuar pozitivë.

Po ashtu në orët e fundit janë shëruar 67 qytetarë, duke e çuar numrin total të tyre në 105.174, që nga fillimi i shfaqjes së epidemisë në Kosovë.

Në përpjekje për të frenuar përhapjen e virusit, autoritetet shëndetësore vijojnë paralelisht kryerjen e procesit të vaksinimit tek ato grupe shoqërore, të cilat janë cilësuar si më të rrezikuara nga infeksioni vdekjeprurës.

Sipas MSH-së, deri tani janë injektuar 110,097 doza vaksine në të gjithë vendin dhe kjo ka rritur më tej opotimizmin e qytetarëve.