Kosova përgatitet për zgjedhje, këtë javë pritet zyrtarizimi i partisë së Vjosa Osmanit

Kosova përgatitet për zgjedhjet e parakohshme parlamentare. Ndërkohë që pritet zbardhja e vendimit të Gjykatës Kushtetuese që çoi ne zgjedhje të parakohshme për të përcaktuar datën e zgjedhjeve në Kosovë, partitë kanë nisur tashmë përgatitjet, duke përcaktuar kandidatët për kryeministër dhe duke projektuar koalicionet e mundshme parazgjedhore.

Korrespondenti i Euronews Albania në Prishtinë Jeton Musliu raportoi se kjo javë pritet t’i hapë rrugë zgjedhjeve të parakohshme me përcaktimin e datës dhe regjistrimin e të gjitha subjekteve që do të bëhen pjesë e garës.

Nga ana e saj ushtruesja e detyrës së presidentit Vjosa Osmani ka deklaruar se sapo Gjykata Kushtetuese të zbardhë vendimin do të shpallë datën e zgjedhjeve.

“Osmani e ka bërë të qartë se do të garojë e vetme në këto zgjedhje. Regjistrimi i një liste politike nuk është i vështirë, bëhet brenda ditës. Osmani ka thënë se në listën e saj do të ketë emra të pastër, të besueshëm. Ditët e fundit ajo ka takuar simpatizantë të LDK që e mbështesin kandidimin e saj.

Ajo ka thënë se brenda kësaj jave do të bëjë të njohur emrin e listës së saj, ndërsa ka publikuar në Facebook atë që me sa duket do të jetë slogani i fushatës: ‘Guxo’”,  tha korrespondenti i Euronews Albania në Kosovë.

Lexoni gjithashtu:

Sfidat e 2021 në rajon, pandemia COVID-19, zgjedhjet dhe integrimi janë çështjet e ‘nxehta’ të këtij viti

​LDK e caktoi kandidat për kryeministër, Avdullah Hoti: Jam i bindur se do të fitojmë