Kosova shton kapacitetet e testimeve, gjashtë spitale rajonale gati për analizat e Covid-19

Kosova do të zgjerojë kapacitetet laboratorike për diagnostikimin e Covid-19. Me aparaturat e vendosura së fundi, 6 spitale rajonale do të kryejnë testime duke nisur nga java e ardhshme

Nga java tjetër, testimet molekulare dhe serologjike për coronavirusin, përveçse në Institutin Kombëtar të Shëndetit Publik, do të bëhen edhe në gjashtë spitalet rajonale.

 Zgjerimi i kapaciteteve vjen në një kohë kur Kosova regjistron shifra në rritje të infektimeve, ndërsa 21 komuna nga 38 në total janë në zonën e kuqe të përhapjes.

“Me sigurimin e këtyre aparaturave, numri i testimeve do të shumëfishohet dhe diagnostifikimi i Covid19 do të bëhet edhe më i shpejtë në çdo pjesë të vendit tonë”, tha Armend Zemaj, ministër i Shëndetësisë

Në anën tjetër, edhe spitalet janë duke trajtuar të infektuarit me të gjitha kapacitetet, teksa numri i të shtruarve ka kaluar shifrën 1000.

 “Këtyre ditëve kemi arritur shifrën prej mbi një mijë pacientëve të shtruar në Klinikat e QKUK dhe spitalet rajonale. Gjithashtu është numër i madh i pacientëve me oksigjeno-terapi, rreth 700 kemi sot, e po ashtu edhe numri i atyre me respiratorë qoftë të intubuar qoftë me metodën joinvazive që gjatë gjithë këtyre ditëve janë sjellë nga 50 deri 60 persona”, u shpreh Valbon Krasniqi ushtrues i detyrës së drejtorit të SHKUK-së

Në 24 orët e fundit në Kosovë janë testuar 1530 persona, nga të cilët janë diagonsitikuar pozitivë 478 raste. Ndërkohë kanë humbur jetën 11 pacientë, si pasojë e Covid-19.