KPK shkarkon ish-kryetaren e Gjykatës së Lartë Shpresa Beçaj

Komisioni i Pavarur i Kualifikimit (KPK) të zyrtarëve në sistemin e drejtësisë shkarkoi të premten gjyqtaren e Apelit të Tiranës, Shpresa Beçaj.

Komisioni ka lexuar vetëm vendimin duke mos kryer një seancë të mirëfilltë dëgjimore. Në seancën e së mërkurës, KPK qe shprehur se në mungesë të deklaratave të pasurisë nuk mund të kryente vlerësim për figurën e Znj. Beçaj, por sidoqoftë të premten KPK tregoi se mund të merrte vendim.

Beçaj, e cila nuk ishte prezente në sallë u përfaqësua nga avokati i saj, nuk mundi ta ndryshonte qëndrimin e KPK-së, që e ndëshkoi për mos dorëzimin e 3 deklaratave të pasurisë për vitet e fundit.

Dy ditë më parë Beçaj justifikoi mosdorëzimin e deklaratave me faktin se kur nisi procesi i vetingut ajo nuk ishte gjyqtare.

Në fakt prej vitit 2014, kur mbaroi mandatin si kryetare e Gjykatës së Lartë, ajo nuk e ushtroi detyrën si gjyqtare në Apelin e Tiranës deri në vitin 2018, kjo për shkak të një konflikti me Këshillin e Lartë të Drejtësi dhe Këshillin e Lartë Gjyqësor, konflikt të cilin e zgjidhi në rrugë ligjore.

Tashmë Beçaj do të qëndrojë e pezulluar deri në një vendim të formës së prerë.

Lexoni gjithashtu:

Vetingu, Valdete Hoxha konfirmohet në detyrë, KPK shtyn vendimin për Shpresa Beçajn

Shpresa Beçaj në veting pa dokumente, KPK refuzon të zhvillojë seancë dëgjimore