KPK shkarkon nga detyra prokurorin Kol Hysenaj

Komisioni i Pavarur i Kualifikimit ka shkarkuar nga detyra prokurorin e Tiranës, Kol Hysenaj.

Komisioni i Pavarur i Kualifikimit konstatoi se nga riçelja e hetimit për prokurorin  Hysenaj, janë konstatuar sërish probleme për kriterin e pasurisë, ndërkohë që ndaj tij ishin depozituar edhe 5 denoncime të reja nga publiku.

Gjatë seancave të kaluara në KPK, prokurori Hysenaj është përballur me një sërë problemesh në të tri kriteret e rivlerësimit.

Më 18 shtator të vitit të kaluar komisioni evidentoi mosdeklarim të kursimeve dhe gjendjes cash në vite, si dhe deklarim të paplotë të burimeve për disa prej pasurive të deklaruara nga ana e prokurorit.

Gjithashtu, Komisioni vlerësoi si “financiarisht jo të logjikshm” një sërë transakionesh.

Prokurori Hysenaj u përball në seancën e parë edhe me një raport të rishikuar të Drejtorisë së Sigurimit të Informacionit të Klasifikuar, DSIK që e gjente të papërshtatashëm për të ushtruar detyrën.

Ndërsa në seancën e fundit të zhvilluar në KPK, ai u akuzua sërish për mos-justifikim të pasurisë.