KQZ-ja pranon listat, tre kandidatë favoritë për kryeministër dhe 1079 për deputetë në Kosovë

Ka përfunduar në Kosovë afati për aplikimin e subjekteve politike për zgjedhjet e 14 shkurtit. Listat e deputetëve që do të marrin pjesë në zgjedhjet e parakohshme parlamentare, janë depozituar në KQZ, ndërsa zyrtarisht në garë për kryeministër shihen si favoritë Enver Hoxhaj nga PDK, Albin Kurti i LVV dhe Avdullah Hoti nga LDK .

 Sipas këtij organi, janë dorëzuar për aplikim dhe certifikim, gjithsej 28 subjekte politike, prej tyre: 21 parti politike; 2 koalicione; dhe 5 iniciativa qytetare, ndërsa numri i kandidatëve është 1079.

Për Lidhjen Demokratike të Kosovës, listën e dorëzoi në KQZ, ministri në detyrë i Infrastrukturës, Arban Abrashi i cili u shpreh i bindur në fitoren e forcës që ai përfaqëson.

Ndërkohë, ish-deputeti në Maqedoninë e Veriut, Ruzhdi Matoshi nga sot i është bashkuar AAK-së, që drejtohet nga Ramush Haradinaj.

Ndërkohë, LVV, pas dorëzimit të 110 emrave kandidatë, e ka shpallur listën edhe në rrjetet sociale, ku qëndrojnë të parët Albin Kurti e Vjosa Osmani. 

Në këto zgjedhje LVV  do të garojë me 41 femra, kandidate për deputete, mes të cilave edhe Vasfije Krasniqi,  gruaja e parë, e cila foli publikisht për tmerrin e përjetuar gjatë luftës së fundit në Kosovë.