KQZ në Kosovë shpall rezultatet e zgjedhjeve lokale

Komisioni Qendror i Zgjedhjeve në Kosovë ka shpallur rezultatet përfundimtare të zgjedhjeve lokale të mbajtura më 17 tetor në të gjithë komunat e vendit për të zgjedhur kryetarët dhe asamblistët.

Tre partitë më të votuara u renditën si më poshtë:

• Lidhja Demokratike e Kosovës (LDK) – 170.177 vota
• Lëvizja Vetëvendosje (LVV) – 167.519 vota
• Partia Demokratike e Kosovës (PDK) – 161.283 vota

Gara ka qenë më e ngushtë me votat e diasporës ku Lidhja Demokratike e Kosovës dhe Lëvizja Vetëvendosje janë përplasur me njëra-tjetrën.

Nga të dhënat përfundimtare, 21 komuna do të shkojnë në balotazh, meqenëse kandidatët s’kanë arritur t’i sigurojnë votat e nevojshme për fitore në raundin e parë. LVV do të shkojë në balotazh në 12 komuna, LDK në 9 komuna, PDK në 8 komuna dhe Aleanca për Ardhmërinë e Kosovës (AAK) në 5 komuna.

Sipas Ligjit për Zgjedhjet Lokale, raundi i dytë i zgjedhjeve ndërmjet dy kandidatëve, të cilët kanë fituar më së shumti vota të vlefshme, mbahet ditën e diel, katër javë pas raundit të parë. Në këtë rast i bie që do të mbahen më 14 nëntor.

Zgjedhjet lokale janë mbajtur më 17 tetor, ku në KQZ ishin certifikuar 89 subjekte politike, prej të cilave janë: 32 parti politike, 1 koalicion, 33 iniciativa qytetare dhe 23 kandidatë të pavarur.

LEXONI GJITHASHTU: 

• Kosova voton, votat nga diaspora mund të ndikojnë në rezultatin e zgjedhjeve
• Kosova voton pa probleme, vetëm tre incidente shqetësuan procesin