Krahas SPAK edhe Prokuroria e Tiranës ka regjistruar 22 procedime për krimet zgjedhore

Krahas SPAK, hetime për krime zgjedhore po kryen edhe prokuroria e Tiranës e cila ka regjistruar 22 procedime penale. Në prokurorinë e posaçme policia e shtetit ka referuar edhe materiale të publikuara nga emisionet investigative.

Prokuroria e Tiranës ka regjistruar 22 procedime penale para, gjatë dhe pas zgjedhjeve të 25 prillit,  lidhur me veprat penale që lidhen me krimet zgjedhore. Hetuesit e prokurorisë së kryeqytetit kanë regjistruar 15 raste vetëm për, “ Përdorimin e funksionit publik në veprimtari politike ose zgjedhore”.

Gjithashtu në prokurorinë e Tiranës po hetohen edhe kallëzimet për veprat penale të shkeljes së fshehtësisë së votimit,  të pengimit të subjekteve zgjedhore , dëmtimi i materialeve zgjedhore, korrupsioni pasiv në zgjedhje dhe Kanosja apo dhunimi ndaj pjesëmarrësve në zgjedhje.

Të enjten kryeprokurori Olsian Çela  përmes një qarkore për 12 prokuroritë e qarqeve kërkoi hetime të shpejta dhe të paanshme për krimet zgjedhore dhe shqyrtim të të gjitha ankesave të ardhura nga partitë politike.  Ndërkohë në Prokurorinë e Posaçme janë 33 procedime në lidhje me parregullsitë në zgjedhje, 29 prej të cilëve për korrupsion në zgjedhje dhe 2 procedime për përdorim të funksioneve publike për veprimtari politike apo zgjedhore.

Burime nga SPAK bëjnë me dije se ditët e fundit janë referuar edhe 2 materiale nga policia e shtetit lidhur me video të publikuara nga emisione investigative ku qytetarë të ndryshëm pretendojnë se kanë marrë para në këmbim të votës.