Kreu i KQZ-së thirrje komisionerëve: Vazhdoni numërimin pa ndërprerje deri në QV-në e fundit

Kryetari i Komisionit Qendror të Zgjedhjeve, Ilirjan Celibashi thotë se procesi i numërimit të votave preferenciale për kandidatët po shkon drejt fundit.

Sipas tij, procesi i numërimit të votave vijon aktualisht në 9 KZAZ në qarkun Tiranë, Durrës, Lezhë dhe Elbasan.

“Procesi i numërimit të votave për kandidatët, drejt fundit. Vijon numërimi në 9 KZAZ (Tiranë, Durrës, Lezhë dhe  Elbasan)”, shkruan Celibashi.

Ai inkurajon komisionerët dhe numëruesit të vazhdojnë punën pa ndërprerje dhe të dhënat t’i hedhin sa më parë në sistemin elektronik të Komisionit Qendror të Zgjedhjeve.

“Komisionerët dhe numëruesit të vazhdojnë numërimin pa ndërprerje deri në QV-në e fundit dhe të mos vonojnë hedhjen e të dhënave në sistemin elektronik të KQZ”, tha ai.