Kreu i veteranëve të UÇK të enjten para Gjykatës Speciale

Të enjten, më 1 tetor në orën 15:00, në sallën e gjyqit të Dhomave të Specializuara të Kosovës (DHSK) në Hagë do të mbahet paraqitja e parë e Hysni Gucatit, raporton KosovaPress.

Dhomat e Specializuara të Gjykatës Speciale, kanë bërë të ditur se paraqitja e parë e Hysni Gucatit do të mbahet në seancë publike, e cila mund të transmetohet përmes transmetimit në Internet.

“Për të dyshuarin është lëshuar fletarrestim për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës, të parapara në Kodin Penal të Kosovës, sikurse përfshihen në nenin 15(2) të Ligjit nr. 05/L-53 për Dhomat e Specializuara dhe Zyrën e Prokurorit të Specializuar”, thuhet në njoftimin e Gjykatës Speciale.

Kreu i Organizatës së Veteranëve të Luftës së UÇK në Kosovë Hysni Gucati u arrestua nga njësia speciale e EULEX më 25 shtator. një ditë më pas u vu në pranga edhe nënkryetari i OVL, Nasim Hardinaj.