Kriptomonedha Bitcoin, Arben Malaj: Duhet pasur kujdes, më shumë një bast se investim real

Ish-ministri i financave, Arben Malaj, në një intervistë për Euronews Albania tha se investimi në kriptomonedhën Bitcoin duhet të bëhet me kujdes.

Ai përmendi si precedent firmat piramidalë ndërkohë që solli në vëmendje dhe qëndrimet e Fondit Monetar Ndërkombëtar apo të Bankës Qendrore Europiane dhe të shumë ekspertëve që pohojnë se investimi në Bitcoin pavarësisht trendit të rritje të monedhës digjitale duhet bërë me kujdes.

“Ajo nuk është një monedhë e lëshuar nga ndonjë Bankë Qendrore dhe ka pas ndonjë siguri tjetër. Ajo më shumë i ngjan një basti sesa një investimi real,” – u shpreh ish-ministri.

Ndërkaq për ekonominë shqiptare, Malaj tha se nuk ka ndonjë rrezik. Ai tha se të pasur shqiptar nuk do të bënin “investime kaq euforike”, ndërkohë që theksoi se si precedent duhen marrë firmat piramidale.

Ndërkaq, gazetarja Loneta Progni, pyeti ish-ministrin se sa të realizueshme janë programet ekonomike të partive politike, duke marrë parasysh se jemi 9 ditë para zgjedhjeve.

“E rëndësishme është që me votë të lirë të shkëputet influenca e parasë kriminale dhe e influencave oligarkike në ekonominë dhe politikën shqiptare. Nëse këto dy risqe potenciale, shqiptarët do t’i reduktojnë me votë në zgjedhjet që do të bëjnë për deputetët e tyre të ardhshëm dhe për qeverinë e ardhshme, patjetër që do të kemi një pikënisje më të mirë,” – u shpreh Arben Malaj.