Krishtlindja mes kufizimeve nga COVID, Thoma Çomëni: Mesha ortodokse në mëngjes, por e pamundur pa praninë e besimtarëve në kishë

Pedagogu dhe teologu i Komunitetit Ortodoks Shqiptar, zoti Thoma Çomëni tha në studion e Euronews Albania se me gjithë kufizimet e vendosura nga ana e qeverisë në kuadër të masave ndaj COVID-19, komuniteti ortodoks do të mbajë meshën e Krishtlindjes, e cila ndryshe nga tradita e të krishterëve mbahet në mëngjes.

Teksa nuk përjashtoi mundësinë që siç ka ndodhur edhe në botë deri tani lutjet të bëhen online, z. Çomëni shpjegoi se në rastin e meshës së Krishtlindjes kemi të bëjmë me një përjashtim, pasi siç tha besimtari merr trupin dhe gjakun e Krishtit, ndaj prania e tij fizike në kishë është shumë e nevojshme.

“Në traditën ortodokse në mënyrë tradicionale zhvillohet në mëngjes dhe në një farë forme s’kemi ndonjë ndryshim në orarin e nisjes së shërbesës.

Për të ruajtur njëri-tjetrin dhe për të respektuar protokollin do ketë 2 mesha, 1 meshë në orën 7-8 dhe në 1 meshë në orën 10:00, që të festojmë, por jo ta kthejmë në rrezik. Mund të bëhen edhe lutje online, por mesha ka ca karakteristika të saj që nuk i bën dot. Mesha është marrja e gjakut dhe trupit të Jezu Krishtit, gjë që s’mund të bëhet pa pjesëmarrjen e besimtarët në kishë”, tha ai.