Kryebashkiaku i Pukës vendos vaksinim të detyrueshëm për administratën

Kryebashkiaku i Pukës Gjon Gjonaj deklaroi se vaksinimi për gjithë administratën shtetërore do të jetë me detyrim.

Nga sot administrata shtetërore duhet të paraqesë kartelen e vaksinimit. Ata që nuk vaksinohen duhet të bëjnë tampon çdo javë.

Përmes një videoje në faqen zyrtare në Facebook të Bashkisë Pukë, Gjonaj u ka bërë thirrje qytetarëve të vaksinohen në mënyrë që COVID-19 të mos vijojë përhapjen.

Sipas tij qytetarët janë shumë mbrapa sa i takon parandalimit të COVID-19, duke marrë parasysh që kanë në dorë vaksinimin. Gjonaj theksoi se secili duhet ta marrë vetë përsipër vaksinimin duke parë gjendjen aktuale pa pasur nevojë për reklama e propagandë.

“Duhet të heqim dorë nga ata zëra të cilët janë helmues për ndërgjegjen, janë helmues për kuptimin e konceptimit se duke u vaksinuar ne marrim dhe mbartim probleme të tjera,” – deklaroi kryebashkiaku i Pukës.

LEXONI GJITHASHTU: 

• Rama apel studentëve dhe pedagogëve: Vaksinimi domosdoshmëri për t’u ulur në auditorë
• Shtyhet deri më 26 shtator mësimi në Kosovë, certifikatë vaksinimi për studentët
• Greqia dhe Italia kërkojnë teste dhe certifikata vaksinimi për punonjësit