Kryeministri britanik Starmer takohet me Presidentin Trump në Shtëpinë e Bardhë

Kryeministri britanik Keir Starmer do të takohet me Presidentin Donald Trump në Shtëpinë e Bardhë këtë të enjte për të diskutuar mbi luftën në Ukrainë dhe lidhjet tregtare dypalëshe. Presidenti amerikan ka kërcënuar me vendosjen e tarifave ndaj Evropës dhe ka kërkuar që kontinenti të mbështetet më pak tek Uashingtoni për sigurinë e tij.

Përpara takimit, Presidenti Trump, i cili dëshiron që anëtarët e NATO-s të rrisin shpenzimet e mbrojtjes në 5% të Prodhimit të Brendshëm Bruto, përsëriti qëndrimin e tij se Evropa duhet të “fuqizohet”. Ai u tha gazetarëve në Shtëpinë e Bardhë të mërkurën se taksapaguesit amerikanë “nuk duhet të paguajnë më shumë sesa evropianët”.

Në atë që duket si përpjekje për të treguar pajtim me kërkesën e Presidentit Trump, Kryeministri Starmer njoftoi dy ditë më parë një rritje të papritur të buxhetit të mbrojtjes së Mbretërisë së Bashkuar në 2.5% të PBB-së deri më 2027. Kryeministri Starmer tha se një vit më pas buxheti për mbrojtjen do të rritet në 2.6% të PBB-së.

LEXONI GJITHASHTU:

• Starmer: Shpenzimet e mbrojtjes në Britani do të rriten 2.5% të PBB-së deri në 2027
• Starmer: Britania e Madhe do të presë samitin e Ukrainës këtë fundjavë