Kryeministri kundër ministrit të Drejtësisë, Hoti kritikon Selimin: Të respektohet ndarja e pushteteve

Mbledhja e Qeverisë së Kosovës, e thirrur urgjentisht për shkak të arrestimeve të fundit, nxori në pah edhe mospajtimet mes anëtarëve të koalicionit qeveritar.

Kryeministri Avdullah Hoti nga LDK dhe ministri i Drejtësisë, Selim Selimi nga AAK, patën përplasje për temën e dialogut duke qenë se ndërprerja e dialogut nga e enjtja është qëndrim i AAK-së.

“Besoj e kemi të gjithë të qartë dhe udhët ta respektojmë plotësisht parimin e ndarjes së pushteteve, në veçanti besoj Ministri i Drejtësisë e ka të qartë më shumë se të gjithë ne këtë çështje. Ne nuk ndërhyjmë dhe nuk komentojmë vendimet e organeve të drejtësisë, edhe më lejoni të ju them qartë, drejtë, hapur, në Qeverinë e Kosovës nuk ka hapësirë për sjellje ndryshe,” – u shpreh kryeministri Hoti.

“Ne duhet të ndërpresim aktivitete tona në raport me dialogun me Serbisë deri në një situatë të re. Çdo lëvizje ndryshe do të jetë në favpr të një pale tjetër dhe shteti ynë por edhe ne si Qeveri mund të jemi në disavantazh,” – tha nga ana tjetër Selimi.

Në fund të mbledhjes ka reaguar sërish kryeministri Avdullah Hoti i cili theksoi se duhet të respektohet parimi i ndarjes së pushteteve.

Mbledhja e Qeverisë pasoi arrestimin e presidentit të vendit, Hashim Thaçi, ish-kryetarin e Kuvendit, Kadri Veseli, dhe shefin e deputetëve të Lëvizjes Vetëvendosje, Rexhep Selimi.

Mbi ish-krerët e Ushtrisë Çlirimtare të Kosovës tashmë po rëndojnë aktakuza për krime të pretenduara të luftës.