Kthehen në Kiev 10 ukrainas të burgosur në Rusi prej shumë vitesh

Dhjetë ukrainas të burgosur prej vitesh janë liruar nga Rusia me ndërmjetësimin e Vatikanit. Presidenti i Ukrainës Volodymyr Zelenskyy njoftoi të premten lirimin e tyre.

Një pjesë e grupit mbërriti gjatë natës në Aeroportin Ndërkombëtar të Kievit, i cili është mbyllur që nga fillimi i luftës.

Ishte hera e parë në më shumë se dy vjet që aeroporti priti pasagjerë. Në mesin e të liruarve ishte edhe zëvendëskryetari i organizatës Mejlis, Nariman Dzhelyal, një organ përfaqësues i popullsisë tartare të Krimesë që u zhvendos në Kiev pasi Rusia aneksoi Krimenë.

Të shtunën, një sulm me dron nga Ukraina goditi një lagje banimi në kufirin me Rusinë, tha guvernatori i rajonit të Kurskut, Alexei Smirnov.

Sipas tij dy fëmijë ishin mes viktimave nga sulmi në fshatin Gorodishche, pak metra larg kufirit me Ukrainën.

Ukraina i ka shtuar sulmet ndaj territorit rus këtë vit, duke goditur infrastrukturën energjetike, por edhe qytete dhe fshatra përgjatë kufirit.

Ndërkohë, një ditë në parë Presidenti rus Vladimir Putin bëri thirrje për rifillimin e prodhimit të raketave bërthamore me rreze të mesme dhe të shkurtër, që ishte ndaluar në bazë të një traktati me Shtetet e Bashkuara, tashmë të shfuqizuar.

Rifillimi i prodhimit të raketave është i nevojshëm tani, tha zoti Putin të premten gjatë një sesioni të Këshillit të Sigurisë të Rusisë, të transmetuar në televizion. Udhëheqësi rus e justifikoi vendimin duke thënë se Shtetet e Bashkuara kanë rifilluar prodhimin dhe vendosjen e raketave në Danimarkë dhe në Filipine.

LEXONI GJITHASHTU:

• Kushtet e Putin për paqe në Ukrainë, vjen reagimi i parë nga Kievi
• Me raketa e dronë, sulme të reja ruse në rajonin e Kievit në Ukrainë