Kualifikohen katër ekipe në Europa League, Roma, Arsenal, Hoffenheim, Leicester kalojnë në raundin tjetër

Roma, Arsenal, Leicester dhe Hofenhaim janë katër skuadrat e para që kanë prerë biletën për në raundin me eliminim direkt të Europa League. Ndeshjet e katërta të Ligës së Europës sollën rezultatet surprizë dhe shumë gola.

Roma triumfoi 0-2 në transfertën rumune të Cluj. Skuadra kryeqytetase tani mund të mendojë për vendin e parë, ku do të rivalizojë me Young Boys.

Anglezët e Leicester siguruan kalimin mes 32 më të mirave të Europa League në frymën e fundit të ndeshjes përballë Bragës. Vardy shënoi në limitet e takimit duke barazuar 3-3, çka ishte një rezultat i mjaftueshëm për të siguruar kualifikimin.

Hofenheim në anën tjetër u imponua 0-2 ndaj Liberec, ndërsa Arsenal nuk hasi asnjë vështirësi përballë Moldes, duke fituar 0-3. Si gjermanët ashtu dhe topçinjtë janë skuadrat e vetme që kanë marrë 12 pikë të plota deri më tani. 

Milan nuk arriti që të merrte më shumë se një barazim përballë në takimin me francezët e Lille. Edhe pse kuqezinjtë shënuan të parët, vendasit barazuan. Kjo është ndeshja e dytë përballë Lille që Milan nuk arrin të fitojë. 

Nuk mund të mos veçohet takimi mes Napolit dhe Rijekës. Të gjithë futbollistët dhe stafi i Napolit zbritën në fushë me fanellat që mbanin numër 10 të Maradonës, në nderim të legjendës, që bëri historinë në Itali ne fanellën e kaltër, duke fituar 2 tituj. Sa i takon përballjes, Napoli arriti që të fitonte 2-0, por i duhet të presë ende për të kaluar më tej.

Në takimet e së enjtes mund të veçohet fitorja 4-0 e Tottenham  ndaj Ludogorets, apo dhe përmbysja e PSV ndaj Paok.