Kundër himnit serb në shkolla, kryetarja e komunës së Preshevës: Qeveria të tërheqë vendimin

Qeveria e Serbisë ka vendosur që në nisje të vitit të ri shkollor në ambientet arsimore të këndohet himni serb.

Përfaqësues të shqiptarëve në Serbi e cilësojnë këtë vendim si një akt përjashtues për grupet etnike që jetojnë në këtë vend.

Ardita Sinani, kryetare e komunës së Preshevës thotë se himni i sotëm i Serbisë nuk përfaqëson komunitet e tjera që janë pjesë e këtij shteti. Në një reagim në rrjetet sociale, Sinani shprehet se vendimi i qeverisë është pjesë e neonacionializmit dhe krijon tensione etnike, kulturore, sociale dhe gjinore.

Kundër vendimit për himnin është shprehur dhe deputeti shqiptar në Serbi, Shuaip Kamberi. Ai thotë se qeveria e Beogradit duhet të heqë dorë nga provokimet dhe të respektojë të drejtat e shqiptarëve në Luginën e Preshevës.

Vendimi për këndimin e himnit për vitin e ri shkollor, u njoftua nga ministri i serb i Arsimit, Shkencës dhe Teknologjisë të Republikës së Serbisë.

LEXONI GJITHASHTU: 

• Twitter etiketon mediat kryesore të Serbisë si ‘të lidhura me qeverinë’
• Lajçak paralajmëron vazhdimin e dialogut Kosovë-Serbi në fillim të shtatorit
• “Open Balkan” i shërben Serbisë për të mos njohur Kosovën, sipas analistit